As enquisas en Vigo caracterízanse neste mandato por presentar os seus resultados menos flutuacións que as elaboradas no mandato anterior. O cadro componse dun BNG con lixeira tendencia á baixa e perda dun edil, dun PSOE e dun PP que se manterían ou gañarían o edil perdido polos nacionalistas.

Mais nesta cidade amoso a miña maior medida de escepticismo sobre a validez do escenario que debuxan as sondaxes. Independentemente da situación política local non concibo que coa candidata mellor valorada (dentro do modesto das notas medias que obteñen todos) e tralo choque que supuxo para as forzas do bipartito a perda da Xunta, o PP non teña asegurado xa desde hai tempo ese representante a maiores que lle falta para a maioría absoluta, e que en 2007 valía uns poucos centos de votos. Hai datos nas enquisas que avalan esta ousada afirmación miña.

– A metade das sondaxes dánlle ao PP abanos que inclúen o tan desexado número 14.

– Hai tres enquisas de autoría descoñecida (non publicada) que corresponden a filtracións interesadas (e polo tanto totalmente desconfiábeis) de enquisas internas dos partidos progresistas: dúas do PSOE e unha do BNG. É un sinal de intentos desesperados de incidir nunha situación electoral que non lles é en absoluto propicia, cuestións deontolóxicas e éticas á marxe.

– No único dato de intención directa de voto que coñezo a porcentaxe de voto decidido ao PP supera á suma de PSOE e de BNG. Só un empate xa me valería para afirmar unha maioría absoluta do PP, a falta de outras formacións con representación.

– A mensaxe de que o PP aínda non conseguiu a vitoria, que trasladaron as últimas enquisas de Ikerfel e Sondaxe, tamén fai pensar na súa idoneidade para os obxectivos do PP de mobilizar até o último momento ao seu electorado.

– É certo que o PSOE recibe entre un 15% e un 20% dos antigos votantes do BNG (que xa só por iso vería perigar non un senón dous concelleiros) e que iso lle podería dar azos, pero cede ao PP máis do que recibe del, e en calquera caso o conxunto da suma PSOE+BNG sae perdendo.

Por tanto outro resultado distinto dunha maioría absoluta de Corina Porro sería para min unha gran sorpresa, malia a ambigüidade das enquisas.

Avaliación á vista dos resultados (25/5/2011)

O principal fallo non foi das enquisas senón da miña interpretación dos datos. Efectivamente había elementos que permitían pensar no crecemento do PSOE e no mantemento do PP, como pode verse na gráfica. Pensei que a proximidade á maioría absoluta en 2007, o crecemento electoral adicional da dereita nestes anos e a valoración dos candidatos tras unha campaña do nivel máis baixo que se teña visto nunca en Galicia en moito tempo, acabarían cunha vitoria popular. Non foi así, e cabe admitir que a campaña electoral foi decisiva para que Abel Caballero opte con todos os méritos a ser o novo Francisco Vázquez: con el o PSOE goberna a cidade española con máis habitantes, e a vitoria pode servirlle para forxar unha aura de autoridade e carisma coa que a cidadanía leva décadas soñando, mirándose no espello coruñés. Ser capaz de manter a posibilidade dunha alcaldía en coalición co BNG cando tiña todo na súa contra fala ben ás claras da importancia do resultado acadado.

Etiquetas:
 

One Response to OPM 2011: Enquisas en Vigo

  1. XCrego di:

    Amigo Carlos, sei que non é nada científico, pero desde a manifestación a favor de Caixanova, non poucos tiñamos a sensación en Vigo de que Caballero tiga ganadas as eleccións. A xestión do tema caixas por parte de Caballero foi impecable, desde o punto de vista electoral.
    Ademais, o cambio que a cidade levou nesta lexislatura, iso si, con diñeiros do Plan E, pero moi ben xestionados, as obras foron un coñazo, pero poderíase dicir que remataron pronto e, sobre todo, en tempo. E o resultado é espectacular.
    Efectivamente, temos un novo Paco Vázquez, pero eu diría que un algo máis listo e zorrito. Penso que falou en galego na noite electoral…
    …………….
    Sobre a asemblea de disidentes que propuxeches, non viña nada mal un encontro sen prexuízos. Eu son disidente desde o primeiro día de existencia do Bloque, porque marchei de Riazor coa xente de Galicia Ceibe, pero nestas eleccións funlles de apoderado na parroquia onde vivo, en Nigrán, porque así mo pediron.

Deixa unha resposta

O teu enderezo electrónico non se publicará Os campos obrigatorios están marcados con *

*