O PSOE vería aumentar a súa representación, segundo as últimas sondaxes de cada instituto, entre 1 e 3 escanos, para acadar de 9 a 11 representantes, en vez dos 8 que ten agora. Esa sería a cifra de edís que perdería o BNG, que podería obter entre 3 e 4, entanto o PP manteríase na cifra de 13, con tendencia á baixa e posibilidades de quedar en 12.
En Ourense temos que descartar unha enquisa filtrada polo PSOE que era a única que o poñía por diante do PP. Tamén desconfío das de Sondaxe, que nas municipais e nesta cidade sempre mediron mal o voto flutuante entre PSOE e BNG, tendendo en 2007 a outorgarllo aos nacionalistas cando ao final se inclinou do lado dos socialistas. Por iso non acredito nos 6 edís que lle outorgaba ao BNG a deste ano.
O candidato do PP non acaba de callar e está mal visto por parte dos seus propios votantes. O candidato natural tivo que deixar paso a outro no medio das liortas entre Feijóo e Baltar. Cando o seu nomeamento un dos bandos filtrou unha enquisa na que Novoa o derrotaba cunha claridade meridiana. O alcalde Rodríguez ten unha valoración de 5,5 sobre 10, por un 4 do candidato popular. A candidata do BNG aínda que relativamente ben valorada apenas supera o 50% de coñecemento, e ten complicado superar o escándalo da contratación irregular da publicidade urbana que provocou os cambios no grupo municipal e no liderado do Bloque na cidade.
Só na medida en que na cidade Ourense as eleccións municipais se convertan nun plebiscito ao goberno de ZP podería o PP ter algunha oportunidade de acadar a maioría absoluta.
Avaliación á vista dos resultados (25/5/2011)
As enquisas acertaron no fundamental: adiantar a conservación da maioría de progreso, mais non atinaron na intensidade da baixada do BNG. Constátase como xa apuntara máis arriba, os enormes erros cometidos polas enquisas de Sondaxe e Ikerfel á hora de outorgar o voto flutuante entre nacionalistas e socialistas, sendo estrepitoso o resultado da última enquisa publicada por La Voz de Galicia. Porén, as de Ipsos, Infortécnica e EPS si amosaron a caída do PP e a suba do PSOE.
Tampouco foron quen de adiantar a a entrada de DO na corporación municipal. Só unha enquisa neste mandato outorgáballe a posibilidade de obter 1 edil, cando finalmente tivo 2. No mandato anterior até 3 enquisas déranlle chances de irromper no consistorio, mais daquela non acadou ningún representante. Sempre é difícil para as sondaxes medir o nivel de voto destas candidaturas independentes minoritarias, aínda que iso non debe servir de desculpa para non tentar corrixir posíbeis defectos.
