PP 43, PSOE 21, BNG 11

Por o 7 de Abril de 2010 · 9 comentarios · En política

Se para a última década de enquisas electorais referidas aos comicios autonómicos galegos se realiza un cálculo dos efectos domésticos (house effects) de cada un dos autores de enquisas, e se ao mesmo tempo se calcula o nesgo que cometen o conxunto das enquisas como instrumento de medición da conxuntura política, pódense corrixir os datos de cada sondaxe publicada para obter unha estimación neutral (ou cando menos máis neutral) da proxección de escanos en cada momento.

A última enquisa publicada é a que apareceu en La Voz de Galicia en febreiro deste ano, realizada por Sondaxe. Trátase da segunda enquisa pública da lexislatura Feijóo e da primeira que realiza unha estimación de voto e de escanos. A enquisa debuxaba este escenario: PPdeG 40, PSdeG-PSOE 23, BNG 12. O resultado corrixido de efectos domésticos e nesgos das enquisas é en cambio: 43 escanos para o PPdeG, 21 para o PSdeG-PSOE, e 11 para o BNG. Tres escanos máis para os populares, dous menos para os socialistas e un menos para os nacionalistas.

A continuación pódense consultar as gráficas que resumen este exercicio numérico de seguimento e control das ferramentas demoscópicas.

Etiquetado con: • • • • • • • • • • •
 
Se che gustou compárteo!
Facebook Twitter Delicious
  • http://nosquedaportugal.blogspot.com caralladas

    cajondiola meu, está a cousa como pra que nos animes asi!!

    de todos xeitos non entendín o concepto da regresión. A idea é que na última década La Voz barreu en contra do PP 2-3 escanos de media, e logo agora tes que correxilo ou que? Non o entendín ben, a verdade.

    • Carlos

      Si, fun parco en explicacións porque son bastante complexas. Estou a escribir un artigo sobre isto dos ‘house effects’ e dos comportamentos das enquisas para prognosticar os resultados das eleccións autonómicas.

      As correccións dos efectos domésticos signfican corrixir os datos de voto decidido (ou intención directa de voto) en base a se un instituto sobrevalora ou infravalora sistematicamente a unha forza política en relación ao comportamento medio de todas as enquisas.

      A correción dos nesgos das enquisas supón contrastar a tendencia central dos resultados das enquisas cos resultados electorais (tres nesta década).

      Esta última corrección é no caso do PPdeG máis importante que a correspondente á neutralización dos efectos domésticos de cada instituto, pois efectivamente as enquisas infravaloraron sistematicamente ao longo da década o resultado dos populares, con diferenzas crecentes canto maior é o seu resultado e maior é a desmobilización do electorado progresista.

      Esa é a fotografía que reflicte a enquisa de comezos de febreiro á cal aplico as correccións.

  • http://nosquedaportugal.blogspot.com caralladas

    Non cho quero crer…

    O do BNG podo crelo perfectamente, pero que o PP suba 5 escanos coa que está montando e co gurtel (que si, xa sei, non lle restará votos, que os seus votantes son asi… pero tampouco llos vai dar, leria), pois me parece incrible.

    Eu creo que algo de efecto pode ter que nos últimos meses os votantes do PP en Galiza sacan peito máis facilmente cando lle fagan unha enquisa, non se irán tanto ó NS/NC, pero de ahi a crer que 4 escanos do soe vanse ir ó pepe… de todos xeitos, a 3 anos das eleccións pouco importa. Veremos o que acontece nas municipais, esa enquisa si que conta.

    Un saúdo.

  • http://acostadamorte.blogspot.com/ Costadamorte

    A miña impresión e que o autor está na boa liña…
    Penso que o que se funde é o PSOE, e non se funde porque o PP gañe votantes, fúndese por abstención dos seus propios votantes…
    En canto ao BNG, estando mal, penso que non se vai afundir moito mais, o afundimento xa o tivo ao pasar dos 18 e 17 aos doce actuais…
    A política de movilizacións do BNG, especialmente no eido linguístico, pode ser un aglomerante para evitar perdas significativas, ainda que na situación actual non da, polo baixo liderazgo e o nivel de disensión interna, para atraer novos votantes, especialmente dende o PSOE, como si sucedeu ao longo dos anos 90…
    O PSOE está moi tocado, unha pola súa inexistencia práctica coma organización galega, e sobre todo pola erosión a que os medios da dereita, e incluso da esquerda, levan sometido a Zapatero e o efecto da crise…
    eu teño claro que o ciclo Feijoo, faga o que faga, é de un mínimo de oito anos, co segundo mandato cun forte incremento de apoios respecto ao primeiro…
    Mais aló, xa veremos, dependerá xa moito da xestión e da coxuntura do Estado…
    (Non descarto que Feijoo repita o ciclo de Fraga e os seus mandatos alónguense por 20 anos), tamén que nos deixe en breve, pero iso sería peor, sería sinal de que da o salto a Madrid substituindo a Rajoy, e nese caso deixaríanos a un propio na Xunta…

  • Pingback: chuza.org

  • alberte

    Pero esta enquisa que fixo La Voz foi pouco despois das eleccións, non?

    • Carlos

      Non. A enquisa á que te refires publicouse no verán de 2009, concreta e non casualmente o 25 de xullo.

      O axuste que presento nesta anotación realizouse sobre outra enquisa máis recente, a segunda pública até o momento, publicada tamén por La Voz con data febreiro de 2010 (traballo de campo a finais de xaneiro).

      A enquisa do verán de 2009 fíxose efectivamente nun momento quente tralas eleccións (4 meses despois das eleccións e 2 meses despois da toma de posesión do novo goberno), e por iso presentaba un escenario de intención de voto (no se realizaba estimación nin de voto nin de escanos) aínda máis favorabel para o PPdeG e peor para o conxunto das forzas da oposición.

      Todas as situacións postelectorais reflicten habitualmente esta situación de afundimento e desmobilización dos perdedores, o que convertía aquela enquisa en pouco fiable para medir o comportamento real do electorado (tendo en conta ademais que faltaban máis de 3 anos e medio até as seguintes eleccións para as que se inquiría o sentido do voto).

      Aínda así pódese contrastar a intensidade dese afundimento comparándoo con outras situacións semellantes (por exemplo, existen barómetros do CIS realizados e publicados en momentos inmediatamente posteriores a unhas eleccións xerais).

      A título informativo comento que de ter realizado o mesmo axuste para aquela primeira enquisa da lexislatura en troques de facelo para esta última a proxección de escanos aproximada sería: PP 44-45, PSdeG-PSOE 20, BNG 9-10. Como é evidente non existe resultado electoral histórico parecido nin próximo, o que revela que son situacións excepcionais vinculadas sempre a unha derrota electoral.

  • Pomponio

    Pois eu creo que a proxección ten creto; a cousa pode estar por aí. Aínda que despois do dito polo autor da evolución entre os traballos de campo de xullo 2009 e xaneiro 2010 hai que constatar que:
    1º. nese período increméntase a «mobilización» polo tema do decreto lingüístico
    2º. da comezo un progresivo incremento da tarefa de oposición

    Despois de febreiro creo que hai alomenos tres cuestións que teñen que ter certa incidencia:
    1º. Probelmática ocasionada pola lei de caixas
    2º. Incrmento do descontento dentro do sector sanitario ante a inminencia privatizadora
    3º. Aparición do caso Gürtell en Galicia.
    A eso hai que engadirlle o incremnto do paro en galicia, a percepción de que a crise non se supera, o derrubo de determinados sectores da administración…. feitos puntuais que traballados dende a oposición sempre axudan a desgastar ao goberno.
    Finalmente teño a percepción de que comeza a medrar un certo número de articulistas que comezan a criticar abertamente ao goberno Feijóo, incluso algúns en el correo ou en LVG.
    parece que hai certo descontento e, aínda que certos estudos din que o papel da prensa o 1M foi menor, as críticas nunca axudan.

    Con todo creo que a imaxe dada por Leiceaga e Aymerich e boa para que a xente perciba que hai alternativa, e que esa alternativa pasa pola necesidade de pacto BNG – PSdG.

    A desunión, falta de lealdade, críticas internas aireadas na prensa foi a puntilla ao bipartito. Traballar para que a xente perciba novas formas de pacto de cara as municipais e uns gobernos municipais «máis sensatos» axudarán a revertir a situación. Sempre que a crise amaine.

  • Pingback: Por un BNG de futuro e con futuro » Arquivos » Olladas na web