Hans Rosling é un profesor sueco que revolucionou hai agora tres anos o xeito en que se visualiza a información estatística vinculada aos fenómenos de desenvolvemento económico.

Aínda que como profesor doutor en saúde internacional realizou varios descubrimentos e traballos dignos de mención (traballou varios anos en Mozambique xunto a comunidades rurais atacadas por enfermidades relacionadas coa desnutrición), non foi até 2006 que a súa sona sobrepasou o ámbito científico internacional. Iso foi debido á compra por parte da Google dunha Fundación que Rosling artellou xunto á súa muller e máis a súa sobriña.

De nome Gapmider (que se podería traducir como ‘lembrete da brecha’) o seu obxectivo é comunicar ao mundo da mellor forma posíbel a realidade do subdesenvolvemento. E Hans Rosling logrouno mediante o deseño dun software chamado Trendalyzer, un programa de visualización de información que atraeu a atención da Google tras unha presentación pública na TED, unha feira do coñecemento baixo a forma de ciclos de conferencias (en realidade unha universidade popular con base tecnolóxica) que ten sede en California.

Dito software caracterízase pola súa simplicidade e vistosidade, xa que mediante animacións e a interactividade co usuario permite afondar nos datos tanto no plano temporal canto no territorial. Aplicado ás fontes estatísticas internacionais sobre o desenvolvemento económico e humano permite apoiar reflexións e discursos moi interesantes sobre a situación e o devir do mundo actual, ás que Rosling acrecenta a súa peculiar e orixinal forma de comunicar.

Mellor que as palabras que eu poida escribir son as imaxes, ver a súa posta en escea. Estes son os vídeos que fan deste home un dos gurús da visualización da información, esa disciplina lindante entre a estatística, o deseño e o sentido común que tanto se bota en falta nesta profesión. Se podedes dedicarlles unha horiña do voso tempo, os tres son altamente recomendábeis e non te deixarán indiferente (posúen lendas en varios idiomas).

O último vídeo sobre Rosling que circula pola rede é un documental realizado pola canle sueca SVT. Nesta páxina pódese ler (en inglés) unha introdución ao personaxe e ao programa citado, incluíndo un corte dunha das súas ‘performances’. O documental enteiro tamén pode verse en liña (con lendas en inglés).

Fotografía de Wikimedia