LaVozdeGalicia.es versus Vieiros.com

Por o 9 de Novembro de 2006 · 6 comentarios · En cultura, estatística, tecnoloxía

Exercicio estatístico, botando man de Google Trends.

Durante o bienio 2005-2006 a versión electrónica do xornal La Voz de Galicia viu aumentar o número de referencias en Google, mentres Vieiros as mantivo máis ou menos estábeis.

Desde que o Google Trends recolle datos continuos para Vieiros pódese apreciar que as diferenzas entre un e outro aumentaron durante este período. Se ao comezo do mesmo Vieiros tiña a metade das referencias de La Voz, os últimos datos sitúan o chan de Vieiros en aproximadamente a cuarta parte (25%) do que ten La Voz.

Tamén se pode inferir o comportamento diferencial que tiveron ambos os dous medios nos dous principais ‘picos’ informativos: nas eleccións ao Parlamento de Galiza de xuño de 2005 e na vaga de incendios de agosto deste mesmo ano 2006. No primeiro evento Vieiros duplicou as súas referencias entanto La Voz só as incrementaba nun 50%. No segundo acontecemento ambos as duplicaron.

Pregúntome polas razóns deste comportamento. O cambio de goberno autonómico é o primeiro que se vén á cabeza, pero reparo tamén no retroceso do galego nas novas xeracións, no perfil máis politizado que ten Vieiros, na lentitude na adopción de novos servizos (RSS (coa de impactos que iso dá, sen contar os servizos de clipping tipo Google News), a renuncia ao multimedia (coa notábel excepción do Apologhit), unha recente ampliación de seccións pouco integrada no portal (GZ deportiva, Máis alá), por non mencionar os sucesivos cambios na dirección do medio.

Agardamos que viren as tornas nos próximos tempos. Polo ben de tod@s. Entrementes, desexamos que Chuza! poida ser medido, como en Alexa.

 
Se che gustou compárteo!
Facebook Twitter Delicious
  • calidonia

    Prezado Xerelo:

    Pode incluír as ligazóns que desexe pois aínda que os comentarios de xente que comenta por vez primeira pasan directamente a moderación teño por costume revisalos e darlles paso (a menos que sexan lixo ou spam).

    Hoxe por hoxe calquera método de medición, de realización de estatísticas na internet é imperfecto: google trends, alexa, relevancia de technorati. Dacordo, mais non desmerezo a información que poden achegar cada un deles e todos en conxunto.

    O asunto dos ‘languages’ no Google Trends refírese a que Google atribúe por defecto como ‘galician’ a linguaxe daquelas páxinas que se visitan maioritariamente desde cidades galegas. Pode probar a facer unha comparación entre El Correo Gallego y La Voz de Galicia (sen Vieiros e sen moito galego polo medio) e verá que o 95% do tráfico por cidades tamén se califica como ‘galician’. Non ten que ver con que sexa un medidor bon ou malo das referencias, tráfico de visitas ou relevancia dos sitios.

    A posición próxima de Vieiros a respecto de El Correo Gallego e do Faro de Vigo, como segunda referencia informativa electrónica de Galiza, penso que vén de vello. Gardo datos polo disco duro do ano 2000 no que xa se daba esta situación de ‘pelotón perseguidor a tres’ (de La Voz) que Vostede refire. A diferenza máis relevante é a que pretendía pór de manifesto coa anotación: Vieiros perde posicións, non só a respecto de La Voz senón tamén do Faro, xa por riba nas últimas semanas, e de El Correo, que se lle achega moito.

    Por certo, o Google Trends permite albiscar a importancia relativa de Santiago de Compostela no conxunto do uso de internet en Galiza (administración autonómica e a maior das universidades) . Iso outórgalle a Vieiros un resultado relativamente inchado a respecto de La Voz e Faro, que son máis fortes noutras cidades nas que, en teoría, cabe esperar un aumento de uso da internet superior durante os próximos anos.

    Intúo que Google Trends mide referencias en google ou buscas realizadas nese buscador, o que é constitúe un criterio que mestura, grosso modo, cantidade de contidos (máis noticias = máis páxinas e ligazóns) e relevancia dos mesmos (hai páxinas, artigos e blogs que nin aparecen no Google).

    Se prefire o criterio de tráfico de Alexa pode testar a ligazón que inclúo ao final da anotación cando falo de Chuza!, e pode acrecentar Correo (Galicia-Hoxe), Faro ou tamén Blogaliza, se o desexa. En calquera caso a sensación de que Vieiros non progresa ao ritmo de outros, e o dato de Alexa que di que nun momento de setembro Chuza! superou a Vieiros, aí están.

  • http://xerelo.blogaliza.org Xerelo

    O Google Trends non me acaba de convencer.

    Se lle dás a Languages, verás que como idioma principal e con diferencia aparece o galego, algo que aínda que desexábel, penso que non é real. Nun principio, pensei que podería ser que asignaran por defecto o galego como lingua das consultas en Galicia, pero ademáis de ser moi improbábel, non encaixa coa proporción do castelán, xa que a porcentaxe de consultas dende fóra de Galiza é mínima. Ou os internautas galegos estamos moi concienciados, ou non funciona moi alá.

    A min déuseme por comparar tanto a La Voz coma Vieiros co Faro. O resultado destes dous últimos é moi similar, agás no último periodo onde Vieiros baixa un pouco. Esta semellanza di moito de Vieiros e moi pouco da edición dixital do Faro.

    Como feito curioso dicir, que nas comparativas con Vieiros en primeiro lugar, aparece o portugués como segundo idioma.

    Poría as ligazóns para quen o quixera comprobar, pero como supoño que terás o filtro anti-spam, mellor nin o intento.

  • http://emepegues.blogaliza.org emepegues

    Hai que ter en conta tamén que a presenza de Vieiros non é comparable coa da Voz, por que deste último hai un xornal en papel en cada esquina, e iso é algo que aínda pesa moito.
    No que si estou de acordo é en que Vieiros debía apostar polo Multimedia, cousa que xa empeza a facer con Máis Alá, é a súa baza máis forte fronte aos medios tradicionais.

  • calidonia

  • Pingback: Intifada ghaiteira » Xoguemos co Google Trends

  • http://xerelo.blogaliza.org/ Xerelo

    Vou contestar todo aquí, porque o de levar dúas conversas á vez supera a miña capacidade de concentración ;-)

    Como xa dixen, aínda que nun principio pensei na posibilidade de que Google asignara o galego como lingua por defecto en Galiza, non é compatíbel coas gráficas de barras mostradas, xa que a suma das buscas dende cidades non galegas non se corresponde coa gráfica do castelán, que sería a que lle correspondería utilizando o binomio lingua-territorio. Máis ca un feito, é unha sospeita que teño. Alén diso, segundo google a aproximación de lingua-territorio non é o método utilizado

    » Language information is determined by the language version of the Google site on which the search was originally entered.»

    Sobre o tema das buscas, aínda que o meu inglés non me permite entender algúns textos coa exactitude desexada, coido que na axuda di que (la voz de galicia) equivale a usar «la voz de galicia» nos buscadores, é dicir, que busca só os lugares onde aparecen tódalas palabras e nesa orde. Pero tampouco é que estea eu moi seguro.

    E sobre a elección dunha ou outra forma, facendo unha busca de lavozdegalicia, conta as veces que aparece esa palabra así, pero penso que non en ligazóns ocultas. É dicir, se ti fas que as palabras «La Voz» teñan unha ligazón a algunha páxina do xornal, non contará na busca, pero se escribes a dirección http://www.lavozdegalicia.com de xeito que sexa visíbel polo lector, si. E esta forma de ligazón oculta é moi habitual.

    Saúdos.